Janne i trykken

Dykk i nynorsk litteratur

28 November 2008 | Leselektyre, Språk | 5 Comments

Endeleg! Ein netthandel full av nydelege ord er no ein realitet.

Kvardagen for ein nynorskbrukar kan vere hard. Vi brukar retteprogram som knapt vil godkjenne orda våre. Vi vert pressa til å skrive ord som skil seg unaturleg mykje frå det vi faktisk seier. Og det er vanskeleg å få tak i bøker med folk som har liknande problem.

Heldigvis går ting framover. Den første kinofilmen med nynorsk teksting har vorte ein realitet. Private skular som Norges Kreative Fagskole opnar for eksamen på nynorsk (når ein har masa om det tre gonger på rad). Og no opnar nettstaden som gir nynorsk litteratur eit ekstra puff opp og fram i rampelyset.

Ei lita verksemd med namnet “Bokdykk.no” har gått frå idé til realitet, og er no ein netthandel med hovudvekt på nynorske utgjevingar. Kjekt er det òg å kunne banke seg på brystet og sei at Bokdykk har hovudkontor i Florø.

I samband med opninga, rullar det ein konkurranse om å skrive den beste 6-ordsnovella. Vinnaren får 1 000 kroner som dei kan bruke på netthandelen. Verd å prøve seg.

Uansett: Book dykk opp med bokdykk.no.

Tagger: bokdykk, bokdykk.no, litteratur, Språk

Rangleri, ranglera

7 January 2008 | Leselektyre | 1 Comment

Med lang ferie, vert det òg lange netter. Og med lange netter, vert det lange soveøkter.

Men etterkvart sig kvardagen på att. Ein må gnikke soverusk ut av augekroken. Ein må stille vekkerklokka. Ein må hoppe ut frå under dyna, sjølv om det absolutt er best å ligge under det varme dun-lokket. Kvar dag og kvar veke vert ein ny start. Ei ny veke. Nokre av oss plar markere starten på det nye året med nyårsløfte. Når dei då vert brotne, kanskje ikkje den første, kanskje ikkje den andre månaden. Men når dei vert brotne, er det greitt å trøyste seg med at det har vore andre før oss som har feila.

Det nye året er eigentleg eit fin-fint høve til å puste støv av gamle klassikarar. Spesielt sidan mannen òg er lokal. Geniale diktarmannen frå Dale.

ETTER EN RANGEL
av Jakob Sande

Ja, i morgon skal eg byrgja på den gode veg, som sagt,
trur eg,
taka striden upp mot kjøtet og den heile djevlesmakt,
trur eg.
Men idag lyt det få vera, for eg er så spøkje tyrst
at eg mest må ha eit ølkrus til å læske meg på fyrst,
trur eg.

Tagger: dikt, døgnrytme, Etter en rangel, Jakob Sande, litteratur