Janne i trykken

Skjult talent ?

24 March 2008 | ..litt på sida, Kuriosa

I ferien får ein tid til aktivitetar som i kvardagen vert dytta langt ned på prioriteringslista.

Til dømes å føre strekar over blanke ark, for så å sjå kva det vert til slutt. Eller “teikne”, som vanlege dødlege kallar det. Det er uansett noko eg ikkje har gjort sidan eit par år før eg flytta ut av heimen i Sunnfjord. Tingen er berre den at eg aldri har hatt god nok fantasi til å finne ut kva og korleis eg skal teikne noko. Får eg derimot noko å sjå etter, går det nokolunde greitt. Med bøkene til tanteungen min som modellar, vart det både teikna ein familie, jungeldyr og ein jeger (stol aldri på mannfolk med støvlettar).

Då eg blafra med arka framfor nasen på mor mi, fekk eg nedslåande respons.

— Dei som vert teiknetalent teiknar gjernar på alt mogleg frå dei kan gå. Hadde du vert ein av dei, hadde vi nok merka det tidlegare enn i ein alder av 22 år.

Takk, takk. Sjølv ho som er “tilsett” for å motivere meg dei gongane ingen andre gjer det, er negativ. Men nokre trøystandes ord hadde ho å meddele meg:

— Ofte synest eg dei enkle teikningane er finast. Ikkje dei med altfor mange detaljar.

Eg kan leve lenge på den, eg. Og strengt tatt. Det har mest vore tidsfordriv mellom barnehyl. Når eg i morgon vender nasen heimover att, vert det nok ikkje investert i blanke ark og fargestiftar, men pågangsmot og forbetra helse.

Heilt på tampen må eg vise dykk mobilen til tanteungen min på 2,5 år. Då ho vart spurt kva for ein av mobilane som var finast, hennar eller “tantusen” sin, var ho kjapp med å svare:

— Min!

Og sant nok. Det kvite sjarmtrollet hennar av ein taletut har store og tydelege tastar. Ei antenne som leiar vekk strålinga frå nøtta, og sist, men ikkje minst: Ein spegel til skjerm. Kva er vel meir nyttig enn å kunne pirke ut popcorn-frø frå mellom tennene før ein rundar hjørnet og troppar opp for eit stevnemøte?

Tagger: mamma, påskeferie, tante-livet, teikne, teikning

3 Comments to Skjult talent ?

Leave a comment